துன்புறுத்தல், கொடுமைப்படுத்துதல் மற்றும் வன்முறையைத் தடுப்போம்

வயது: 13 வயதிற்கு மேற்பட்டவர்கள்

பதிவிறக்கம் செய்ய:

நேரம்: 20 நிமிடங்கள்

தகவல்கள்: கொடுமைப்படுத்துதல், மற்றும் வன்முறையைத் தடுப்போம்

முக்கிய நோக்கம்: துன்புறுத்தலற்ற, பாதுகாப்பான மற்றும் கண்ணியமான பாடசாலைச் சூழலை உருவாக்குதல்.

இந்தப் பாடத்தில் நாம் எதைப் பற்றிப் பேசப்போகிறோம்?

துன்புறுத்தல், கொடுமைப்படுத்துதல் மற்றும் வன்முறை என்றால் என்ன, அவற்றை எவ்வாறு அடையாளம் காண்பது, அத்தகைய சம்பவங்கள் நிகழும்போது எவ்வாறு பாதுகாப்பாகப் பதிலளிப்பது என்பவற்றை இந்தப் பாடத்தின் மூலம் கற்றுக்கொள்வோம்.

உடல் ரீதியான துன்புறுத்தல் மட்டுமன்றி, வார்த்தைகளால் துன்புறுத்துதல், ஒருவரைத் தனிமைப்படுத்துதல், பாலியல் துன்புறுத்தல் மற்றும் இணையவழித் துன்புறுத்தல் (Cyberbullying) பற்றியும் பேசுவோம். துன்புறுத்தலுக்கு உள்ளாவது குழந்தையின் தவறல்ல என்பதையும், அதைப் பற்றி ஒருவரிடம் கூறுவது “கோள் சொல்லுதல்” அல்ல என்பதையும் வலியுறுத்துவோம்.

கற்றல் நோக்கங்கள்

1. துன்புறுத்தல் மற்றும் கொடுமைப்படுத்துதலை அடையாளம் காணுதல்.
2. பல்வேறு வகையான துன்புறுத்தல்கள் பற்றி அறிந்துகொள்ளுதல்.
3. நகைச்சுவைக்கும் துன்புறுத்தலுக்கும் இடையிலான வேறுபாட்டைப் புரிந்துகொள்ளுதல்.
4. தனக்கோ அல்லது நண்பருக்கோ துன்புறுத்தல் ஏற்பட்டால் பாதுகாப்பாகப் பதிலளித்தல்.
5. நம்பிக்கைக்குரிய வயது வந்த ஒருவரிடம் உதவி கேட்பதன் முக்கியத்துவத்தைப் புரிந்துகொள்ளுதல்.

பாடத்திற்கு முன் தயாராகுவோம்

Bakteens கட்டுரையையும் அதிலுள்ள வினாடி வினாவையும் வாசித்துப் பாருங்கள். பாடசாலையில் துன்புறுத்தல் சம்பவத்தை யாரிடம் முறைப்பாடு செய்யலாம், அதற்காகப் பின்பற்ற வேண்டிய நடைமுறை என்ன என்பதைக் கண்டறியுங்கள்.

குழந்தைகளின் தனிப்பட்ட அனுபவங்களை வகுப்பின் முன்னிலையில் வெளிப்படுத்துமாறு கேட்க வேண்டாம். பாடத்தின்போது ஒரு குழந்தை துன்புறுத்தல் அல்லது வன்முறை சம்பவத்தை வெளிப்படுத்தினால், பின்பற்ற வேண்டிய சிறுவர் பாதுகாப்பு நடைமுறைகளை அறிந்திருப்பது முக்கியம்.

தேவையான பொருட்கள்: திரையில் காண்பிக்கக்கூடிய அல்லது அச்சிடப்பட்ட Bakteens கட்டுரை, சிறிய அட்டைகள் அல்லது காகிதங்கள், பலகை மற்றும் பேனாக்கள்.

முக்கிய சொற்கள்: துன்புறுத்தல் (Harassment), கொடுமைப்படுத்துதல் (Bullying), வன்முறை (Violence), இணையவழித் துன்புறுத்தல் (Cyberbullying), பாலியல் துன்புறுத்தல் (Sexual harassment), நம்பிக்கைக்குரிய வயது வந்தவர் (Trusted adult), முறைப்பாடு செய்தல் (Reporting).

ஆசிரியர்களுக்கான வழிகாட்டல்

துன்புறுத்தலில், ஒருவருக்கு அச்சம், வலி அல்லது அவமானத்தை ஏற்படுத்துவதற்காக அதிகாரம் பயன்படுத்தப்படுகிறது. இந்த அதிகாரம் உடல் வலிமையை மட்டும் குறிக்காது. வயது, பாடசாலையில் வகிக்கும் பதவி, பிரபலத்தன்மை, நண்பர்கள் குழு அல்லது தனிப்பட்ட தகவல்கள் ஆகியவற்றையும் அதிகாரமாகப் பயன்படுத்தலாம்.

துன்புறுத்தல் மீண்டும் மீண்டும் நிகழலாம். இருப்பினும், கடுமையான தாக்குதல், பாலியல் துன்புறுத்தல், அச்சுறுத்தல் அல்லது தனிப்பட்ட புகைப்படத்தை அனுமதியின்றிப் பகிர்தல் போன்ற சம்பவங்கள் ஒருமுறை நிகழ்ந்தாலும் உடனடியாக உதவி பெறுவது அவசியம்.

துன்புறுத்தலுக்கான காரணங்களைப் பற்றி கலந்துரையாடலாம். ஆனால் எந்தக் காரணத்தாலும் துன்புறுத்தலை நியாயப்படுத்த முடியாது.

1. கலந்துரையாடலைத் தொடங்குவோம் – 2 நிமிடங்கள்

பலகையில் பின்வருமாறு எழுதுங்கள்:

“ஒரு நல்ல நகைச்சுவை என்றால் அனைவரும் சிரிப்பார்கள்.”

மாணவர்களிடம் கேளுங்கள்:

• ஒரு நகைச்சுவை எப்போது துன்புறுத்தலாக மாறுகிறது?
• ஒருவர் “வேண்டாம்” என்று கூறிய பின்னரும் அதைத் தொடர்ந்து செய்தால், அது நகைச்சுவையாக இருக்குமா?

மாணவர்களிடமிருந்து இரண்டு அல்லது மூன்று கருத்துகளைக் கேட்டுக்கொள்ளுங்கள். பின்னர் இவ்வாறு கூறுங்கள்:

“ஒருவருக்கு மனவேதனை ஏற்பட்டால், அச்சம் அல்லது அவமானம் உணர்ந்தால் அல்லது ‘வேண்டாம்’ என்று கூறிய பின்னரும் அந்தச் செயல் நிறுத்தப்படாவிட்டால், அது சாதாரண நகைச்சுவை அல்ல.”

2. துன்புறுத்தலை அடையாளம் காண்போம் – 5 நிமிடங்கள்

மாணவர்களைச் சிறிய குழுக்களாகப் பிரியுங்கள். ஒவ்வொரு குழுவிற்கும் அட்டைகள் அல்லது காகிதங்களைக் கொடுங்கள்.

அவர்கள் அறிந்த துன்புறுத்தல் முறைகளை அட்டைகளில் எழுதுமாறு கூறுங்கள். அவற்றைப் பின்வரும் வகைகளின் கீழ் பலகையில் எழுதுங்கள்:

1. உடல் ரீதியான துன்புறுத்தல்
2. வார்த்தைகளால் துன்புறுத்துதல்
3. உளவியல் அல்லது சமூக ரீதியான துன்புறுத்தல்
4. பாலியல் துன்புறுத்தல்
5. இணையவழித் துன்புறுத்தல்

தேவையானால், பின்வரும் உதாரணங்களை வழங்குங்கள்:

• அடித்தல், தள்ளுதல் அல்லது சொத்துகளுக்குச் சேதம் விளைவித்தல்.
• பெயர் சொல்லிக் கேலி செய்தல் அல்லது ஒருவரின் உடலைப் பற்றி கேலி செய்தல்.
• வதந்திகளைப் பரப்புதல் அல்லது ஒருவரைக் குழுவிலிருந்து தனிமைப்படுத்துதல்.
• விருப்பமற்ற முறையில் உடலைத் தொடுதல் அல்லது பாலியல் கருத்துகளைத் தெரிவித்தல்.
• அவமதிக்கும் செய்திகள், புகைப்படங்கள் அல்லது காணொளிகளைப் பகிர்தல்.
• போலியான கணக்கை (Fake account) உருவாக்குதல்.

இறுதியில் கேளுங்கள்:

“துன்புறுத்தல் என்பது அடித்தலை மட்டும் குறிக்கிறதா?”

3. உண்மையா, தவறான கருத்தா? – 4 நிமிடங்கள்

பின்வரும் வாக்கியங்களை ஒவ்வொன்றாக வாசியுங்கள். மாணவர்களிடம் “உண்மையா? தவறான கருத்தா? ஏன்?” என்று கேளுங்கள்.

“ஒரு நகைச்சுவையால் ஒருவர் மனவேதனை அடைந்தாலும் அதைப் பொருட்படுத்தத் தேவையில்லை.”

தவறான கருத்து. ஒரு நகைச்சுவையால் ஒருவருக்கு அச்சம், அவமானம் அல்லது வேதனை ஏற்பட்டால், அது துன்புறுத்தலாக இருக்கலாம்.

“துன்புறுத்தல் பற்றி ஆசிரியரிடம் கூறுவது கோள் சொல்லுவதாகும்.”

தவறான கருத்து. துன்புறுத்தலைப் பற்றிக் கூறுவது பாதுகாப்பைப் பெறுவதற்கும் அதனை நிறுத்துவதற்கும் எடுக்கப்படும் ஒரு நடவடிக்கையாகும்.

“துன்புறுத்தலைக் கண்டால் அதில் தலையிடாமல் அமைதியாக இருப்பதே சிறந்தது.”

தவறான கருத்து. பாதுகாப்பாகச் செய்ய முடிந்தால், துன்புறுத்தலுக்கு உள்ளாகும் நண்பருக்கு ஆதரவளித்து, நம்பிக்கைக்குரிய வயது வந்த ஒருவரிடம் தெரிவிக்க வேண்டும்.

“இணையவழித் துன்புறுத்தல் நிகழ்ந்தால், திரைப்பிடிப்புகளையும் (Screenshots) செய்திகளையும் பாதுகாப்பாக வைத்திருப்பது முக்கியம்.”

உண்மை. அவை முறைப்பாடு செய்வதற்குத் தேவையான சான்றுகளாக இருக்கலாம். ஆனால் அவற்றை மீண்டும் சமூக ஊடகங்களில் பகிர வேண்டாம்.

இறுதியில் விளக்குங்கள்:

“துன்புறுத்தலுக்கு உள்ளாவது உங்கள் தவறல்ல. உதவி கேட்பது பலவீனம் அல்ல.”

4. Bakteens கட்டுரையை வாசிப்போம் – 3 நிமிடங்கள்

கட்டுரையின் பின்வரும் பகுதிகளைக் காண்பியுங்கள்:

• துன்புறுத்தல் மற்றும் கொடுமைப்படுத்துதல் என்றால் என்ன?
• அது உண்மையில் நகைச்சுவையா?
• யாராவது உங்களைத் துன்புறுத்தினால் என்ன செய்வது?
• ஒரு நண்பர் துன்புறுத்தப்படுவதைப் பார்த்தால் என்ன செய்ய வேண்டும்?

கட்டுரையின் ஒரு பகுதியை வாசித்த பின்னர் கேளுங்கள்:

“ஒரு நண்பர் துன்புறுத்தப்படுவதைப் பார்த்தால், நாம் பாதுகாப்பாக என்னென்ன செய்யலாம்?”

தேவையானால், பின்வரும் பதிலைக் கூறி உதவுங்கள்:

“நண்பருடன் பாதுகாப்பான இடத்திற்குச் செல்லுங்கள், அவர் கூறுவதைக் கவனமாகக் கேளுங்கள், நம்பிக்கைக்குரிய வயது வந்த ஒருவரிடம் தெரிவியுங்கள்.”

5. இப்போது  வினாவைச் செய்வோம் – 4 நிமிடங்கள்

Bakteens கட்டுரையிலுள்ள வினாடி வினாவிலிருந்து இந்தப் பாடத்திற்குப் பொருத்தமான கேள்விகளைத் தெரிவுசெய்து வகுப்பாகச் செய்யுங்கள். ஒவ்வொரு பதிலுக்குப் பின்னரும் கேளுங்கள்:

“நீங்கள் ஏன் இந்தப் பதிலைத் தெரிவுசெய்தீர்கள்?”

பின்னர் இரண்டு சுருக்கமான வாய்மொழிக் கேள்விகளைக் கேளுங்கள்.

கேள்வி 1: ஒருவர் “வேண்டாம்” என்று கூறிய பின்னரும் நகைச்சுவை தொடர்ந்து செய்யப்படுமானால், அது துன்புறுத்தலாக இருக்க முடியுமா?

பதில்: ஆம்.

கேள்வி 2: துன்புறுத்தல் பற்றி யாரிடம் தெரிவிக்கலாம்?

பதில்கள்: பெற்றோர், பாதுகாவலர், நம்பிக்கைக்குரிய ஆசிரியர், பாடசாலை ஆலோசகர், பிரிவுத் தலைவர் அல்லது அதிபர் ஆகியோரிடம் தெரிவிக்கலாம்.

6. இறுதிச் செய்தி – 2 நிமிடங்கள்

மாணவர்களிடம் கேளுங்கள்:

“எமது வகுப்பறையைத் துன்புறுத்தலற்ற பாதுகாப்பான இடமாக மாற்றுவதற்கு உங்களால் செய்யக்கூடிய ஒரு செயல் என்ன?”

சில பதில்களைக் கேட்ட பின்னர் இவ்வாறு கூறி முடிக்கவும்:

“துன்புறுத்தல் என்பது அடித்தலை மட்டும் குறிக்காது. வார்த்தைகள், அச்சுறுத்தல்கள், தனிமைப்படுத்துதல், விருப்பமற்ற தொடுகைகள் மற்றும் இணையவழிச் செயல்பாடுகள் மூலமாகவும் துன்புறுத்தல் நிகழலாம். துன்புறுத்தலுக்கு உள்ளாவது உங்கள் தவறல்ல. அதனைத் தனியாகச் சகித்துக்கொண்டிருக்க வேண்டிய அவசியமில்லை. உதவி கிடைக்கும் வரை நம்பிக்கைக்குரிய வயது வந்த ஒருவரிடம் தெரிவியுங்கள்.”

ஆசிரியர்களுக்கு ஒரு சிறிய நினைவூட்டல்

கேள்வி → குழுச் செயல்பாடு → தவறான கருத்துகள் பற்றிய கலந்துரையாடல் → கட்டுரை → வினாடி வினா

“துன்புறுத்தும் குழந்தை ஒரு கெட்ட குழந்தை” என்று முத்திரை குத்த வேண்டாம். அந்த நடத்தை தீங்கு விளைவிக்கக்கூடியது என்பதையும், அதை நிறுத்தி அதற்கான பொறுப்பை ஏற்க வேண்டும் என்பதையும் தெளிவுபடுத்துங்கள்.

ஒரு குழந்தை துன்புறுத்தல் சம்பவத்தை வெளிப்படுத்தினால்:

• அமைதியாகக் கேளுங்கள்.
• குழந்தை கூறுவதை நீங்கள் நம்புகிறீர்கள் என்பதைத் தெரிவியுங்கள்.
• அதைப் பற்றி கூறியது சரியான செயல் என்பதைச் சொல்லுங்கள்.
• அது குழந்தையின் தவறல்ல என்பதை நினைவூட்டுங்கள்.
• குழந்தையின் பாதுகாப்பை உறுதிப்படுத்துங்கள்.
• பாடசாலையின் சிறுவர் பாதுகாப்பு நடைமுறைகளைப் பின்பற்றுங்கள்.

குழந்தையைப் பாதுகாப்பதற்காகப் பொறுப்பான ஒருவருக்குத் தகவல்களை வழங்க வேண்டியிருக்கலாம் என்பதையும் விளக்குங்கள்.

பாடத்திற்குப் பின்னர் “துன்புறுத்தலற்ற பாடசாலை” என்ற கருப்பொருளில் சுவரொட்டிப் போட்டி, வகுப்பு உறுதிமொழி அல்லது பாடசாலை விழிப்புணர்வு பிரசாரம் ஒன்றை ஏற்பாடு செய்யலாம். இதற்காக உண்மையான சம்பவங்கள், குழந்தைகளின் பெயர்கள் அல்லது புகைப்படங்களைப் பயன்படுத்த வேண்டாம்.

பாதுகாப்பான வகுப்பறையை உருவாக்குவோம்

• ஒருவருடைய கருத்துகள் மற்றும் அனுபவங்களைக் கேலி செய்யமாட்டோம் என்று மாணவர்கள் அனைவரும் இணைந்து ஒப்புக்கொள்ளச் செய்யுங்கள்.
• குழந்தைகளின் தனிப்பட்ட அனுபவங்களை வகுப்பின் முன்னிலையில் பகிருமாறு கட்டாயப்படுத்த வேண்டாம்.
• தவறான பதில் வழங்கப்பட்டால், மாணவரை அவமானப்படுத்தாமல் சரியான தகவல்களை வழங்குங்கள்.
• “நீங்களும் ஏதாவது செய்திருப்பீர்கள்” என்று கூறித் துன்புறுத்தலுக்கு உள்ளான குழந்தையைக் குற்றம் சாட்ட வேண்டாம்.
• துன்புறுத்திய குழந்தையையும் துன்புறுத்தலுக்கு உள்ளான குழந்தையையும் வகுப்பின் முன்னிலையில் நேருக்கு நேர் அமர்த்தி விசாரிக்க வேண்டாம்.
• கடுமையான தாக்குதல், பாலியல் துன்புறுத்தல், அச்சுறுத்தல் அல்லது தனிப்பட்ட புகைப்படத்தைப் பகிர்தல் போன்ற சம்பவங்களைப் பற்றித் தெரிந்துகொண்டால், உடனடியாகச் சிறுவர் பாதுகாப்பு நடைமுறைகளைச் செயல்படுத்துங்கள்.

  his resource has been developed based on the AgeAppropriate Sexuality Education, Communication Guideline for Sri Lanka.

  Key Concept 4: Violence and Staying Safe

  https://srilanka.unfpa.org/sites/default/files/pubpdf/2date26date7/AgeAppropriate%20Sexuality%20Education%2C%20Communication%20Guideline%20for%20Sri%20Lanka.pdf