அதிகம் எழும் கேள்விகள்

இளம்பருவம் என்றால் என்ன?

பொதுவாக, 10 முதல் 19 வயது வரையிலான காலப்பகுதி இளம்பருவம் எனப்படுகிறது. இக்காலத்தில் உடல், சிந்தனைகள், உணர்வுகள் மற்றும் பிறருடனான உறவுகளில் மாற்றங்கள் ஏற்படுகின்றன. பருவமடைதல் என்பது இக்காலத்துடன் தொடர்புடைய உடல் வளர்ச்சிச் செயல்முறையாகும்.

எனது உடலில் ஏன் மாற்றங்கள் ஏற்படுகின்றன?

உடலில் உற்பத்தியாகும் ஹார்மோன்கள் இந்த மாற்றங்களில் முக்கிய பங்கு வகிக்கின்றன. ஹார்மோன்கள் என்பவை உடலின் பல்வேறு பகுதிகளுக்குச் செய்திகளை எடுத்துச் செல்லும் இரசாயனப் பொருட்களாகும். உயரம் அதிகரித்தல், மார்பகங்கள் வளர்ச்சியடைதல், குரலில் மாற்றம் ஏற்படுதல் மற்றும் உடலில் முடி வளர்தல் போன்றவை வளர்ச்சியின் இயல்பான பகுதிகளாகும்.

எனது நண்பர்களின் உடலில் மாற்றங்கள் ஏற்பட்டுள்ளன. ஆனால், எனது உடலில் ஏன் இன்னும் மாற்றங்கள் ஏற்படவில்லை?

அனைவருக்கும் ஒரே வயதில் அல்லது ஒரே வேகத்தில் பருவமடைதல் ஏற்படுவதில்லை. குடும்பத்திலிருந்து பெறப்படும் மரபணுக்களும் உடல்நலமும் இதனைப் பாதிக்கலாம். மாற்றங்கள் மிக விரைவாகத் தொடங்கினாலோ அல்லது நீண்ட காலமாக எந்த மாற்றமும் ஏற்படாவிட்டாலோ, பெரியவர் ஒருவருடன் அருகிலுள்ள MOH (சுகாதார மருத்துவ அதிகாரி) அலுவலகத்திற்குச் சென்று ஆலோசனை பெறலாம்.

முகத்தில் பருக்கள் ஏன் ஏற்படுகின்றன? நான் என்ன செய்ய வேண்டும்?

ஹார்மோன் மாற்றங்களால் சருமத்தில் எண்ணெய் உற்பத்தி அதிகரித்து, மயிர்க்கால்கள் அடைபடலாம். மென்மையான சருமச் சுத்திகரிப்புப் பொருளைப் பயன்படுத்தி முகத்தைக் கழுவுங்கள். பருக்களை அழுத்திப் பிழியவோ சருமத்தை வலுவாகத் தேய்க்கவோ வேண்டாம். வலியுடன் கூடிய பருக்கள், தழும்புகள் அல்லது பருக்கள் காரணமாக அதிக மனக்கவலை ஏற்பட்டால் மருத்துவ சிகிச்சையைப் பெற்றுக்கொள்ளலாம்.

எனது உடலின் வடிவம் அல்லது சரும நிறம் காரணமாக நான் குறைந்த மதிப்புடையவரா?

இல்லை. உங்கள் உடலின் வடிவம், அளவு அல்லது சரும நிறம் உங்கள் மதிப்பைத் தீர்மானிப்பதில்லை. சமூக ஊடகங்களில் காணப்படும் புகைப்படங்கள் பல நேரங்களில் மாற்றியமைக்கப்பட்டிருக்கலாம். உங்கள் உடலை இழிவுபடுத்துவதற்கு எவருக்கும் உரிமை இல்லை.

இரண்டு மார்பகங்களின் அளவுகள் வேறுபடுவது இயல்பானதா?

ஆம். ஒரு மார்பகம் மற்றொன்றைவிடச் சற்று பெரியதாக இருப்பது இயல்பானது. உடல் வளர்ச்சியடையும் காலத்தில் இந்த வேறுபாடு மேலும் தெளிவாகத் தெரியலாம்.

ஆண்குறி அல்லது விரைகளின் அளவு அனைவருக்கும் ஒரே மாதிரியாக இருக்குமா?

இல்லை. அவற்றின் அளவும் வடிவமும் ஒவ்வொருவருக்கும் வேறுபடலாம். ஒரு விரை மற்றொன்றைவிடச் சற்று தாழ்வாக இருப்பதும் இயல்பானதே.

மீசை, தாடி அல்லது உடல் முடிகளை வெட்டினால் அவை அடர்த்தியாக வளருமா?

இல்லை. முடிகளை வெட்டுவதால் அவற்றின் உண்மையான அடர்த்தியோ வளர்ச்சி வேகமோ மாறுவதில்லை. வெட்டப்பட்ட முடியின் முனை நேராக இருப்பதால், மீண்டும் வளரும் முடிகள் தடிமனாக இருப்பதுபோல் உணரப்படலாம். உடல் முடிகளை அகற்றுவது கட்டாயமான ஒன்றல்ல.

யோனியும் வெளிப்புறப் பெண் பிறப்புறுப்புகளும் ஒன்றா?

இல்லை. யோனி (Vagina) என்பது உடலின் உள்ளே அமைந்துள்ள ஒரு குழாய் போன்ற பகுதியாகும். யோனியின் உதடுகள் மற்றும் பெண்குறிமுனை (Clitoris) உள்ளிட்ட வெளிப்புறப் பகுதிகளின் தொகுப்பு வெளிப்புறப் பெண் பிறப்புறுப்பு (Vulva) எனப்படுகிறது. சிறுநீர் வெளியேறும் துவாரம் யோனித் துவாரம் அல்ல.

பிறப்புறுப்புகளை எவ்வாறு சுத்தமாக வைத்துக்கொள்வது?

வெளிப்புறப் பகுதிகளைச் சுத்தமான நீரால் மென்மையாகக் கழுவுங்கள். யோனியின் உட்பகுதியில் சவர்க்காரம், வாசனைப் பொருட்கள் அல்லது வேறு சுத்திகரிப்புப் பொருட்களைப் பயன்படுத்த வேண்டாம். சுத்தமான உள்ளாடைகளை அணியுங்கள். அரிப்பு, புண்கள், வலி அல்லது வழக்கத்திற்கு மாறான துர்நாற்றம் இருந்தால் மருத்துவ ஆலோசனையைப் பெறுங்கள்.

மாதவிடாய் என்றால் என்ன?

மாதவிடாய் என்பது கருப்பையின் உட்புறப் படலத்தின் ஒரு பகுதி இரத்தத்துடன் யோனி வழியாக வெளியேறும் செயல்முறையாகும். இது ஹார்மோன்களால் கட்டுப்படுத்தப்படும் ஒரு இயல்பான செயல்முறையாகும். மாதவிடாய் இரத்தம் “அசுத்தமான இரத்தம்” அல்ல.

முதல் மாதவிடாய் ஏற்பட்டதும் நான் வயது வந்தவராகிவிடுவேனா?

இல்லை. அது உடல் வளர்ச்சியின் ஒரு கட்டம் மட்டுமே. மாதவிடாய் ஏற்படுவது திருமணம் செய்துகொள்ளவோ, பாலியல் உறவில் ஈடுபடவோ அல்லது குழந்தையை வளர்க்கவோ ஒருவர் தயாராகிவிட்டார் என்று அர்த்தமல்ல. உங்களுக்கு தொடர்ந்து கல்வி, பாதுகாப்பு மற்றும் ஆதரவு தேவை.

எனக்கு இன்னும் மாதவிடாய் ஆரம்பிக்கவில்லை. எப்போது மருத்துவ ஆலோசனை பெற வேண்டும்?

16 வயதாகியும் மாதவிடாய் ஆரம்பிக்கவில்லை என்றால் மருத்துவ ஆலோசனையைப் பெறுங்கள். இதனால் கட்டாயமாக ஏதேனும் நோய் உள்ளது என்று அர்த்தமல்ல.

ஒவ்வொரு மாதமும் ஒரே நாளில் மாதவிடாய் ஏற்பட வேண்டுமா?

இல்லை. முதல் சில ஆண்டுகளில் மாதவிடாய் சுழற்சி ஒழுங்கற்றதாக இருக்கலாம். மாதவிடாய் ஆரம்பிக்கும் திகதிகளைக் குறித்து வைத்துக்கொள்ளுங்கள். நீண்ட காலமாக மாதவிடாய் ஏற்படாமல் இருந்தாலோ, அடிக்கடி மிகவும் ஒழுங்கற்ற மாதவிடாய் ஏற்பட்டாலோ அல்லது வேறு அசௌகரியங்கள் இருந்தாலோ MOH அலுவலகத்தில் ஆலோசனை பெறலாம்.

மாதவிடாய் நாட்களில் குளிக்கவும், விளையாடவும் அல்லது பாடசாலைக்குச் செல்லவும் முடியுமா?

ஆம். உங்களுக்கு வசதியாக இருந்தால் வழக்கமான வேலைகளைச் செய்யலாம். குளிப்பதால் மாதவிடாய் நின்றுவிடாது. மென்மையான உடற்பயிற்சிகள் சிலருக்கு மாதவிடாய் வலியைக் குறைக்க உதவும். வலி காரணமாகப் பாடசாலைக்குச் செல்ல முடியாவிட்டால், அதைப் புறக்கணிக்காமல் மருத்துவ ஆலோசனையைப் பெறுங்கள்.

மாதவிடாய் வலியைக் குறைப்பது எப்படி?

வெதுவெதுப்பான நீர் நிரப்பிய பையைத் துணியால் சுற்றி அடிவயிற்றின் மீது வைக்கலாம். மெதுவாக நடக்கவும் ஓய்வெடுக்கவும் செய்யுங்கள். தேவைப்பட்டால், உங்கள் வயதுக்கும் உடல்நிலைக்கும் பொருத்தமான வலி நிவாரணியைப் பயன்படுத்துவது குறித்து மருத்துவரிடம் ஆலோசனை பெறுங்கள். கடுமையான மாதவிடாய் வலி ஏற்பட்டால் அதற்கான சிகிச்சைகள் உள்ளன.

மாதவிடாய் தொடர்பாக எந்தச் சந்தர்ப்பங்களில் உடனடியாக மருத்துவ ஆலோசனை பெற வேண்டும்?

இரத்தப்போக்கு மிகவும் அதிகமாக இருந்தாலோ, தலைச்சுற்றல் அல்லது மயக்கம் ஏற்பட்டாலோ, வலி மிகவும் கடுமையாக இருந்தாலோ மருத்துவ உதவியைப் பெறுங்கள். நீண்ட காலமாக அதிக இரத்தப்போக்கு ஏற்பட்டால் இரத்தச்சோகை ஏற்படலாம்.

மாதவிடாய் சுகாதாரப் பொருட்களை எவ்வாறு தேர்ந்தெடுப்பது?

சுகாதாரத் துவாய்கள், மீண்டும் பயன்படுத்தக்கூடிய துணித் துவாய்கள், டாம்பான்கள் மற்றும் மாதவிடாய்க் கிண்ணங்கள் போன்ற பல தெரிவுகள் உள்ளன. உங்களுக்கு வசதியான, எளிதில் கிடைக்கக்கூடிய மற்றும் சுத்தமாகப் பயன்படுத்தக்கூடிய ஒன்றைத் தேர்ந்தெடுங்கள். அந்தப் பொருளுடன் வழங்கப்பட்டுள்ள வழிமுறைகளுக்கு ஏற்ப அதனை மாற்றவும், கழுவவும் அல்லது காலி செய்யவும் வேண்டும்.

யோனியிலிருந்து வெள்ளை அல்லது தெளிவான திரவம் வெளியேறுவது இயல்பானதா?

பெரும்பாலும் ஆம். மாதவிடாய் சுழற்சிக்கு ஏற்ப அதன் அளவு மாறக்கூடும். ஆனால், அரிப்பு, எரிச்சல், கடுமையான துர்நாற்றம், வலி அல்லது வழக்கத்திற்கு மாறான நிறத்துடன் திரவம் வெளியேறினால் மருத்துவப் பரிசோதனையைப் பெற்றுக்கொள்ளுங்கள். இதுகுறித்து MOH அலுவலகத்திலும் ஆலோசனை பெறலாம். இவ்வாறான எல்லா நிலைகளும் பாலியல் ரீதியாகப் பரவும் தொற்றுகள் என்று அர்த்தமல்ல.

கன்னித்திரையைப் பரிசோதித்து ஒருவர் பாலியல் உறவில் ஈடுபட்டுள்ளாரா என்பதைக் கண்டறிய முடியுமா?

இல்லை. யோனித் துவாரத்திற்கு அருகில் உள்ள ஹைமன் (Hymen) எனப்படும் திசுவின் வடிவமும் நெகிழ்வுத்தன்மையும் ஒவ்வொருவருக்கும் வேறுபடும். அதனைப் பரிசோதிப்பதன் மூலமோ முதல் பாலியல் உறவின்போது இரத்தப்போக்கு ஏற்பட்டதா என்பதைக் கவனிப்பதன் மூலமோ ஒருவரின் பாலியல் அனுபவத்தை உறுதிப்படுத்த முடியாது. “கன்னித்தன்மைப் பரிசோதனை” என்பது அறிவியல் அடிப்படையிலான பரிசோதனை அல்ல.

எனக்குப் பாலியல் உணர்வுகள் ஏற்படுவது இயல்பானதா?

ஆம். இளம்பருவத்தில் பாலியல் உணர்வுகளும் ஆர்வமும் ஏற்படலாம். சிலருக்கு இவை குறைவாகவும் உணரப்படலாம். ஒரு உணர்வு ஏற்பட்டதற்காக அதன்படி செயல்பட வேண்டிய அவசியமில்லை. உங்கள் எல்லைகளையும் மற்றவர்களின் எல்லைகளையும் மதியுங்கள்.

எவரிடமும் காதல் அல்லது பாலியல் ஈர்ப்பு ஏற்படாமல் இருப்பது தவறா?

இல்லை. அனைவருக்கும் இந்த உணர்வுகள் ஒரே விதமாகவோ ஒரே காலத்திலோ ஏற்படுவதில்லை. சிலருக்கு அவை மிகக் குறைவாகவோ அல்லது ஒருபோதும் ஏற்படாமலோ இருக்கலாம். மற்றவர்களுடன் உங்களை ஒப்பிட்டுக்கொண்டு ஒரு உறவை ஏற்படுத்திக்கொள்ள உங்களை நீங்களே கட்டாயப்படுத்த வேண்டியதில்லை.

சுய இன்பம் என்றால் என்ன? அது தீங்கு விளைவிக்குமா?

தனது உடலைத் தொட்டு பாலியல் இன்பம் பெறும் செயல்முறை சுய இன்பம் எனப்படுகிறது. பொதுவாக இது தீங்கு விளைவிப்பதில்லை. இதனால் மலட்டுத்தன்மை, உடல் பலவீனம் அல்லது பார்வைக் குறைபாடு ஏற்படுவதில்லை. சுய இன்பத்தில் ஈடுபடுவதும் ஈடுபடாமல் இருப்பதும் தனிப்பட்ட தெரிவுகளாகும்.

சுய இன்பம் தொடர்பாக எப்போது கவனம் செலுத்த வேண்டும்?

வலி அல்லது காயம் ஏற்பட்டால் அதை நிறுத்துங்கள். அது உங்கள் தூக்கம், பாடசாலைப் பணிகள் அல்லது அன்றாட வாழ்க்கைக்குத் தடையாக இருந்தால் ஆலோசனை பெறுங்கள். அனைவருக்கும் பொருந்தக்கூடிய ஒரே “சாதாரண” எண்ணிக்கை என்று எதுவும் இல்லை. தனியுரிமையையும் சுத்தத்தையும் பேணுவதில் கவனம் செலுத்துங்கள்.

காரணமின்றி ஆண்குறி விறைப்பது ஏன்?

ஹார்மோன்கள் மற்றும் நரம்பு மண்டலத்தின் செயல்பாடுகளால் ஆண்குறிக்குள் அதிக இரத்தம் பாயும்போது அது விறைப்பாகிறது. பாலியல் சிந்தனைகள் இல்லாத நேரத்திலும் இது நிகழலாம். பொதுவாக இது தானாகவே குறைந்துவிடும்.

தூக்கத்தின்போது விந்து வெளியேறுவது ஒரு நோயா?

இல்லை. இது தூக்கத்தில் விந்து வெளியேறுதல் அல்லது ஈரக் கனவுகள் எனப்படுகிறது. சிலருக்கு ஏற்படும் இயல்பான நிகழ்வாகும். இதனால் உடல் பலவீனமடைவதில்லை. இது ஏற்படாமல் இருப்பதும் இயல்பானதே. வலி அல்லது இரத்தப்போக்கு இருந்தால் மருத்துவ ஆலோசனையைப் பெறுங்கள்.

ஆபாசக் காணொளிகளில் காட்டப்படும் விடயங்கள் உண்மையான பாலியல் உறவுகளைப் போன்றவையா?

பெரும்பாலும் இல்லை. அவை நடிப்புடனும் தொகுப்புடனும் உருவாக்கப்பட்ட காட்சிகளாகும். அவற்றில் சம்மதம், பாதுகாப்பு மற்றும் உண்மையான உடல் வேறுபாடுகள் சரியாகக் காட்டப்படாமல் இருக்கலாம். பாலியல் தொடர்பான விடயங்களைக் கற்றுக்கொள்வதற்கு அவற்றைப் பயன்படுத்துவது பொருத்தமானதல்ல. அதற்குப் பதிலாக நம்பகமான கல்வி வளங்களைப் பயன்படுத்துங்கள்.

முதல் முறையாகப் பாலியல் உறவில் ஈடுபட்டாலும் கர்ப்பம் தரிக்க முடியுமா?

ஆம். விந்தணு ஒன்று கருமுட்டையுடன் இணைவதன் மூலம் கர்ப்பம் உருவாகலாம். முதல் முறை என்பதால் கர்ப்பம் தரிக்கும் அபாயம் குறைவதில்லை. முதல் மாதவிடாய்க்கு முன்னரும் கருமுட்டை வெளியேறக்கூடும். எனவே, மாதவிடாய் இன்னும் ஆரம்பிக்காத ஒருவருக்கும் கர்ப்பம் தரிக்கும் வாய்ப்பு இருக்கலாம்.

முத்தமிடுவதன் மூலமோ கழிப்பறை இருக்கையில் அமர்வதன் மூலமோ கர்ப்பம் தரிக்க முடியுமா?

இல்லை. முத்தமிடுதல், கட்டிப்பிடித்தல் அல்லது கழிப்பறை இருக்கையைப் பயன்படுத்துதல் போன்றவற்றால் கர்ப்பம் ஏற்படாது. கர்ப்பம் ஏற்படுவதற்கு விந்தணுக்கள் யோனிக்குள் நுழைந்து கருமுட்டையை அடைய வேண்டும்.

விந்து வெளியேறுவதற்கு முன்பு ஆண்குறியை வெளியே எடுத்தால் கர்ப்பத்தைத் தடுக்க முடியுமா?

இது நம்பகமான கருத்தடை முறை அல்ல. சரியான நேரத்தில் ஆண்குறியை வெளியே எடுக்கத் தவறக்கூடும். விந்து வெளியேறுவதற்கு முன் வெளிப்படும் திரவத்திலும் விந்தணுக்கள் இருக்கலாம். இந்த முறையால் பாலியல் ரீதியாகப் பரவும் தொற்றுகளிலிருந்தும் பாதுகாப்புப் பெற முடியாது.

கருத்தடை முறைகள் என்றால் என்ன?

கர்ப்பம் ஏற்படுவதற்கான வாய்ப்பைக் குறைக்கும் முறைகள் கருத்தடை முறைகள் எனப்படுகின்றன. ஆணுறைகள், கருத்தடை மாத்திரைகள், ஊசிகள், தோலின் கீழ் பொருத்தப்படும் கருத்தடைச் சாதனங்கள் மற்றும் கருப்பைக்குள் வைக்கப்படும் கருத்தடைச் சாதனங்கள் ஆகியவை அவற்றில் அடங்கும்.

ஆணுறைகளைப் பயன்படுத்துவது ஏன் முக்கியம்?

ஆணுறைகளைச் சரியாகவும் ஒவ்வொரு முறையும் பயன்படுத்துவதன் மூலம் கர்ப்பம் ஏற்படுவதையும் பாலியல் ரீதியாகப் பரவும் தொற்றுகள் பரவுவதையும் தடுக்க முடியும். ஏனைய கருத்தடை முறைகள் பாலியல் ரீதியாகப் பரவும் தொற்றுகளிலிருந்து பாதுகாப்பு அளிப்பதில்லை.

இரண்டு ஆணுறைகளை ஒரே நேரத்தில் பயன்படுத்தினால் அதிக பாதுகாப்பு கிடைக்குமா?

இல்லை. இரண்டு ஆணுறைகளை ஒரே நேரத்தில் பயன்படுத்தும்போது உராய்வு அதிகரித்து அவை கிழியக்கூடும். ஒவ்வொரு முறையும் புதிய ஆணுறை ஒன்றைப் பயன்படுத்துங்கள். காலாவதித் திகதியையும் பொதியையும் சரிபாருங்கள். லேட்டெக்ஸ் ஆணுறைகளுடன் எண்ணெய், வாசலின் அல்லது லோஷன் பயன்படுத்த வேண்டாம்.

ஆணுறை கிழிந்துவிட்டால் அல்லது பாதுகாப்பின்றிப் பாலியல் உறவில் ஈடுபட்டால் என்ன செய்ய வேண்டும்?

முடிந்தவரை விரைவாக மருத்துவர் அல்லது மருந்தாளரிடம் அவசரக் கருத்தடை முறைகள் குறித்து ஆலோசனை பெறுங்கள். முறையைப் பொறுத்து ஐந்து நாட்கள் வரை பயன்படுத்தக்கூடிய தெரிவுகள் இருந்தாலும், விரைவாகப் பெற்றுக்கொள்வது சிறந்தது. யோனியைக் கழுவுவதன் மூலம் கர்ப்பத்தைத் தடுக்க முடியாது.

அவசரக் கருத்தடை மாத்திரைகள் கருக்கலைப்பை ஏற்படுத்துமா?

இல்லை. அவை கருமுட்டை வெளியேறுவதைத் தடுக்கவோ தாமதப்படுத்தவோ செய்கின்றன. ஏற்கனவே ஏற்பட்டுள்ள கர்ப்பத்தை அவை முடிவுக்குக் கொண்டுவருவதில்லை. எதிர்காலத்தில் குழந்தை பெற்றுக்கொள்ளும் திறனையும் அவை பாதிப்பதில்லை.

நான் கர்ப்பமாக இருக்கிறேனா என்பதை எவ்வாறு அறிந்துகொள்வது?

கர்ப்பப் பரிசோதனையைச் செய்யுங்கள். பொதுவாக மாதவிடாய் தவறிய முதல் நாளிலிருந்து பரிசோதனை செய்யலாம். அடுத்த மாதவிடாய் வரவேண்டிய திகதி தெரியாவிட்டால், கடைசியாகப் பாதுகாப்பற்ற பாலியல் உறவில் ஈடுபட்ட நாளிலிருந்து 21 நாட்களுக்குப் பிறகு பரிசோதனை செய்யுங்கள். இத்தகைய சூழ்நிலையில் நம்பகமான பெரியவர் ஒருவரின் உதவியைப் பெற்றுக்கொள்ளுங்கள்.

பாலியல் ரீதியாகப் பரவும் தொற்று ஒருவருக்கு இருக்கிறதா என்பதை அவருடைய தோற்றத்தை வைத்து அறிய முடியுமா?

இல்லை. பல தொற்றுகளுக்கு வெளிப்படையான அறிகுறிகள் இருக்காது. சில நேரங்களில் புண்கள், வழக்கத்திற்கு மாறான திரவ வெளியேற்றம் அல்லது சிறுநீர் கழிக்கும்போது எரிச்சல் போன்ற அறிகுறிகள் இருக்கலாம். தொற்று உள்ளதா என்பதை அறியத் தேவையான பரிசோதனைகள் குறித்து மருத்துவரிடம் ஆலோசனை பெறுங்கள். அறிகுறிகள் இல்லாததால் தொற்று இல்லை என்பதை உறுதிப்படுத்த முடியாது.

HIV மற்றும் AIDS இரண்டும் ஒன்றா?

இல்லை. HIV என்பது உடலின் நோய் எதிர்ப்புச் சக்தியைப் பாதிக்கும் ஒரு வைரஸ் ஆகும். சிகிச்சை பெறாத HIV தொற்றின் மிகவும் முற்றிய நிலை AIDS எனப்படுகிறது. முறையான சிகிச்சையின் மூலம் HIV உடன் வாழ்பவர்கள் நீண்டகாலம் ஆரோக்கியமாக வாழ முடியும்.

HIV உள்ள ஒருவருடன் உணவைப் பகிர்ந்துகொண்டாலோ அல்லது அவரைக் கட்டிப்பிடித்தாலோ எனக்கும் HIV தொற்று ஏற்படுமா?

இல்லை. உணவைப் பகிர்ந்துகொள்வது, கட்டிப்பிடிப்பது, கைகுலுக்குவது அல்லது ஒரே கழிப்பறையைப் பயன்படுத்துவது போன்றவற்றின் மூலம் HIV பரவாது. HIV உடன் வாழ்பவர்களை ஒதுக்க வேண்டிய அவசியமில்லை. மற்றவர்களைப் போலவே அவர்களும் மரியாதையையும் ஆதரவையும் பெற வேண்டும்.

பாலியல் உறவின் மூலம் HIV தொற்று ஏற்படும் அபாயம் இருந்தால் என்ன செய்ய வேண்டும்?

இத்தகைய சூழ்நிலையில் நம்பகமான பெரியவர் ஒருவரின் உதவியைப் பெற்றுக்கொள்ளுங்கள். மேலதிக தகவல்களை இங்கே பெற்றுக்கொள்ளலாம்: https://know4sure.lk/

ஆரோக்கியமான காதல் உறவை எவ்வாறு அடையாளம் காண்பது?

அந்த உறவில் நீங்கள் பாதுகாப்பாக உணர்வீர்கள். உங்கள் கருத்துகள், தனிப்பட்ட எல்லைகள், நண்பர்கள் மற்றும் கல்வி ஆகியவற்றுக்கு மதிப்பளிக்கப்படும். பயமின்றி “இல்லை” என்று சொல்ல முடியும். உங்கள் தொலைபேசியைப் பரிசோதிப்பது, கடவுச்சொற்களைக் கேட்பது, மிரட்டுவது அல்லது நண்பர்களிடமிருந்து உங்களை விலக்குவது போன்றவை அன்பின் அடையாளங்கள் அல்ல.

சம்மதம் அல்லது இணக்கம் என்றால் என்ன?

பயம், அழுத்தம் அல்லது ஏமாற்றம் இல்லாமல், ஒரு விடயத்தைப் புரிந்துகொண்டு சுதந்திரமாக அதற்கு ஒப்புக்கொள்வதே சம்மதம் எனப்படுகிறது. அமைதியாக இருப்பது சம்மதம் அல்ல. தூங்கிக்கொண்டிருக்கும் ஒருவராலும் அல்லது முடிவெடுக்க முடியாத அளவுக்கு மதுபானம் அல்லது போதைப்பொருளின் தாக்கத்தில் இருக்கும் ஒருவராலும் சம்மதம் தெரிவிக்க முடியாது.

முன்பு சம்மதித்திருந்தாலும் பின்னர் “இல்லை” என்று சொல்ல முடியுமா?

ஆம். எந்த நேரத்திலும் ஒருவர் தனது சம்மதத்தை மாற்றிக்கொள்ளலாம். முன்பு சம்மதித்திருப்பது, காதல் உறவில் இருப்பது அல்லது ஒரு விடயத்திற்கு ஒப்புக்கொண்டிருப்பது மற்றொரு விடயத்திற்கும் சம்மதம் தெரிவித்ததாகாது. ஒருவர் விருப்பமில்லை என்று தெரிவித்தால் மற்றவர் நிறுத்த வேண்டும்.

“என்னை நேசித்தால் இதைச் செய்” என்று ஒருவர் கட்டாயப்படுத்தினால் என்ன செய்ய வேண்டும்?

உங்கள் அன்பை நிரூபிப்பதற்காக உங்களுக்கு விருப்பமில்லாத ஒன்றைச் செய்ய வேண்டியதில்லை. பாலியல் செயல்களில் ஈடுபடுமாறு அல்லது தனிப்பட்ட புகைப்படத்தை அனுப்புமாறு கட்டாயப்படுத்துவது ஏற்றுக்கொள்ள முடியாதது. உங்களுக்குப் பாதுகாப்பாக இருந்தால் உங்கள் விருப்பமின்மையைத் தெளிவாகத் தெரிவியுங்கள். அச்சுறுத்தல் இருந்தால் பாதுகாப்பான இடத்திற்குச் சென்று நம்பகமான பெரியவரின் உதவியைப் பெறுங்கள்.

எனக்குப் பாலியல் துன்புறுத்தல் ஏற்பட்டால் என்ன செய்ய வேண்டும்?

அது உங்கள் தவறு அல்ல. முடிந்தால் பாதுகாப்பான இடத்திற்குச் சென்று நம்பகமான பெரியவர் ஒருவரிடம் தெரிவியுங்கள். காயங்கள் வெளியில் தெரியாவிட்டாலும் விரைவாக மருத்துவமனைக்குச் செல்லுங்கள். 18 வயதிற்குக் குறைவானவர்கள் 1929 என்ற சிறுவர் உதவிச் சேவையை அழைக்கலாம். இது இலவசமாக 24 மணி நேரமும் செயல்படுகிறது.

எனக்கு ஒரே பாலினத்தவரிடம் ஈர்ப்பு ஏற்படுவதோ அல்லது எனது பாலின அடையாளம் வேறுபட்டதாக உணரப்படுவதோ ஒரு நோயா?

இல்லை. பாலியல் ஈர்ப்பும் பாலின அடையாளமும் ஒவ்வொருவரிடமும் வெவ்வேறாக இருக்கலாம். இத்தகைய சூழ்நிலையில் நம்பகமான பெரியவர் ஒருவரிடமிருந்து ஆதரவைப் பெற்றுக்கொள்ளலாம்.

பாடசாலையிலோ இணையத்திலோ எனக்குத் துன்புறுத்தல் ஏற்பட்டால் என்ன செய்ய வேண்டும்?

அது உங்கள் தவறு என்று நினைக்க வேண்டாம். நடந்த சம்பவம், திகதி மற்றும் தொடர்புடைய நபர்கள் பற்றிய விவரங்களைக் குறித்து வைத்துக்கொள்ளுங்கள். இணையத் துன்புறுத்தல் என்றால், தொடர்புடைய செய்திகளுக்கான ஆதாரங்களைப் பாதுகாத்து, அந்தக் கணக்கைப் புகாரளியுங்கள். நம்பகமான ஆசிரியர் ஒருவரிடமோ பெரியவர் ஒருவரிடமோ தெரிவியுங்கள். முதல் நபர் உதவி செய்யாவிட்டால் மற்றொருவரிடம் தெரிவியுங்கள்.

எனது தனிப்பட்ட புகைப்படத்தை வெளியிடுவதாக ஒருவர் மிரட்டினால் என்ன செய்ய வேண்டும்?

மேலும் புகைப்படங்களையோ பணத்தையோ அனுப்ப வேண்டாம். மிரட்டல் செய்திகள், கணக்கின் பெயர் மற்றும் இணைய இணைப்புகள் போன்றவற்றைப் பதிவு செய்து வைத்துக்கொள்ளுங்கள். அந்தப் புகைப்படங்களை மற்றவர்களுக்கு அனுப்ப வேண்டாம். நம்பகமான பெரியவர் ஒருவரின் உதவியைப் பெற்று, சம்பந்தப்பட்ட இணையத் தளத்தில் புகாரளியுங்கள். 18 வயதிற்குக் குறைவானவர்கள் 1929 என்ற இலக்கத்தை அழைக்கலாம்.

அடிக்கடி சோகம், பயம் அல்லது கவலை ஏற்பட்டால் நான் என்ன செய்ய வேண்டும்?

நீங்கள் நம்பும் ஒருவருடன் பேசுங்கள். தூக்கம், உணவு மற்றும் அன்றாட வேலைகள் குறித்து கவனம் செலுத்துங்கள். இந்த உணர்வுகள் தொடர்ந்து நீடித்தாலோ அல்லது பாடசாலைப் பணிகளுக்கும் உறவுகளுக்கும் இடையூறாக இருந்தாலோ மருத்துவர் அல்லது பயிற்சி பெற்ற மனநல நிபுணரின் உதவியைப் பெறுங்கள். உதவி கேட்பது பலவீனத்தின் அடையாளம் அல்ல.

எனக்கே தீங்கு விளைவிக்க வேண்டும் அல்லது என் வாழ்க்கையை முடித்துக்கொள்ள வேண்டும் என்ற எண்ணம் ஏற்பட்டால் என்ன செய்ய வேண்டும்?

உடனடியாக நம்பகமான பெரியவர் ஒருவரிடம் தெரிவியுங்கள். தனியாக இருக்க வேண்டாம். உங்களுக்குத் தீங்கு ஏற்படுத்தக்கூடிய பொருட்களிலிருந்து விலகி இருங்கள். 1926 என்ற தேசிய மனநல உதவிச் சேவையை அழைக்கவும். ஏற்கனவே காயம் ஏற்பட்டிருந்தாலோ, அளவுக்கு அதிகமாக மருந்துகளை எடுத்திருந்தாலோ அல்லது உடனடியாக உங்களுக்குத் தீங்கு விளைவிக்கும் அபாயம் இருந்தாலோ, உடனடியாக அருகிலுள்ள மருத்துவமனையின் அவசர சிகிச்சைப் பிரிவுக்குச் செல்லுங்கள்.