சுற்றுச்சூழலைப் பாதுகாப்பது பற்றிப் பேசுவோம்

பெற்றோர்கள் மற்றும் குடும்பங்களுக்கான நடைமுறை வழிகாட்டி

தங்களைச் சுற்றியுள்ள சுற்றுச்சூழலை எவ்வாறு பாதுகாப்பது என்பதைப் பிள்ளைகள், பெரியவர்கள் செய்வதைப் பார்த்தே கற்றுக்கொள்கிறார்கள். பொருட்கள் வாங்கச் செல்லும்போது மீண்டும் பயன்படுத்தக்கூடிய பையை எடுத்துச் செல்வது, பழுதடைந்த பொருளைச் சரிசெய்வது அல்லது ஒரு மரத்தைப் பராமரிப்பது போன்ற செயல்கள் மூலம் சுற்றுச்சூழல் பற்றிக் கற்றுக்கொள்ளும் விடயங்களை அன்றாடப் பழக்கங்களாக மாற்றிக்கொள்ள முடியும்.

சுற்றுச்சூழல் பிரச்சினைகளைப் புரிந்துகொள்ளவும், அவற்றுக்காகச் செயல்படவும் பெற்றோர்கள் இளையவர்களுக்கு வாய்ப்புகளை வழங்கலாம். உங்கள் குடும்பத்தால் செய்யக்கூடிய சிறிய மாற்றங்களுடன் தொடங்கி, படிப்படியாக முன்னேறுங்கள்.

நம்மைச் சுற்றியுள்ள விடயங்களைக் கவனிப்போம்

ஒன்றாகச் சிறிது தூரம் நடந்து செல்லுங்கள். அல்லது வீட்டைச் சுற்றியுள்ள பகுதிகளைப் பார்வையிடுங்கள். பின்வரும் கேள்விகளைக் கேளுங்கள்:

“குப்பைகள் எங்கே அதிகமாகக் குவிந்துள்ளன?”

“நாம் அதிகமாகப் பயன்படுத்திவிட்டு வீசும் ஒருமுறைப் பயன்படுத்தும் பிளாஸ்டிக் பொருட்கள் எவை?”

“இன்னும் பயன்படுத்தக்கூடிய நிலையில் இருக்கும் எத்தகைய பொருட்களை நாம் வீசுகிறோம்?”

“மரங்கள் அல்லது நிழல் இருந்தால், எந்த இடங்கள் இன்னும் வசதியாக இருக்கும்?”

பிள்ளைகள் தாங்கள் கவனித்தவற்றையும் தங்களுடைய கருத்துகளையும் பகிர்ந்துகொள்ள வாய்ப்பளியுங்கள். இந்த உரையாடலைப் பிள்ளைகளின் அறிவைப் பரிசோதிக்கும் சந்தர்ப்பமாக மாற்ற வேண்டாம்.

நீங்கள் இவ்வாறு கூறலாம்:

“நாம் ஒன்றாகச் சேர்ந்து நல்ல மாற்றத்தை ஏற்படுத்தக்கூடிய ஒரு விடயத்தைத் தேர்ந்தெடுப்போம்.”

பிளாஸ்டிக் பயன்பாட்டைக் குறைப்பதை குடும்பப் பழக்கமாக மாற்றுவோம்

தேவையற்ற பிளாஸ்டிக் பயன்பாட்டைக் குறைப்பதும், பொருட்களை மீண்டும் பயன்படுத்துவதும் பிளாஸ்டிக் மாசுபாட்டைக் குறைப்பதில் முக்கியமானவை. மறுசுழற்சியும் இதற்கான தீர்வின் ஒரு பகுதியாகும்.

பின்வரும் நடைமுறை மாற்றங்களில் சிலவற்றை முயற்சித்துப் பாருங்கள்:

• மீண்டும் பயன்படுத்தக்கூடிய பொருட்கள் வாங்கும் பைகளை வீட்டின் வாசலுக்கு அருகில் வையுங்கள்.

• பாதுகாப்பான குடிநீர் கிடைக்கும் இடங்களில், மீண்டும் நிரப்பிப் பயன்படுத்தக்கூடிய தண்ணீர்ப் போத்தலை எடுத்துச் செல்லுங்கள்.

• கழுவி மீண்டும் பயன்படுத்தக்கூடிய உணவுப் பெட்டியைப் பயன்படுத்துங்கள்.

• தேவையற்ற பைகள், பானக் குழாய்கள் மற்றும் ஒருமுறை பயன்படுத்திவிட்டுத் தூக்கி எறியப்படும் கரண்டிகள், முட்கரண்டிகள் ஆகியவற்றைத் தவிருங்கள்.

• பொருத்தமானதும் விலை கொடுத்து வாங்கக்கூடியதுமான மாற்றுப் பொருட்கள் கிடைக்கும்போது, குறைந்த பொதியிடலுடன் கூடிய பொருட்களைத் தேர்ந்தெடுங்கள்.

ஏற்கனவே உங்களிடம் இருக்கும் பொருட்களைப் பயன்படுத்துங்கள். ஒரு புதிய பொருள் “சுற்றுச்சூழலுக்கு உகந்தது” என்று குறிப்பிடப்பட்டிருப்பதால் மட்டுமே, நல்ல நிலையில் இருக்கும் பை அல்லது உணவுப் பெட்டிக்குப் பதிலாக அதனை வாங்க வேண்டிய அவசியமில்லை.

மீண்டும் பயன்படுத்தக்கூடிய பொருட்களை எடுத்துச் செல்வதை நினைவில் வைத்துக்கொள்வதற்கும், அவற்றைக் கழுவி, தயாராக வைத்திருப்பதற்கும் குடும்பத்தின் அனைத்து உறுப்பினர்களையும் ஈடுபடுத்துங்கள்.

வீணாக்கத்தைக் குறைக்கும் வாழ்க்கை முறையை உருவாக்குவோம்

ஏதாவது ஒன்றை வாங்குவதற்கு முன்பு ஒன்றாகச் சேர்ந்து இவ்வாறு கேட்டுக்கொள்ளுங்கள்:

“இந்தப் பொருள் நமக்குத் தேவையா? ஏற்கனவே இருக்கும் ஒன்றைச் சரிசெய்யவோ, ஒருவரிடமிருந்து கடனாகப் பெற்றுப் பயன்படுத்தவோ அல்லது நம்மிடம் இருக்கும் வேறொரு பொருளைக் கொண்டு இந்தத் தேவையைப் பூர்த்தி செய்யவோ முடியுமா?”

பாடசாலை உபகரணங்களைப் பாதுகாப்பது, ஆடைகளைச் சரிசெய்வது மற்றும் இன்னும் பயன்படுத்தக்கூடிய பொருட்களை மற்றவர்களுக்கு வழங்குவது போன்றவற்றில் பிள்ளைகளுக்கு உதவுங்கள்.

குடும்பமாகப் பின்வரும் பழக்கங்களையும் ஏற்படுத்திக்கொள்ளலாம்:

• உணவு வீணாவதைக் குறைப்பதற்காக உணவு தயாரிப்பதை முன்கூட்டியே திட்டமிடுதல்.

• தேவையற்ற மின்விளக்குகளை அணைத்தல்.

• நீர் கசியும் குழாய்களைச் சரிசெய்தல்.

• பாதுகாப்பானதும் நடைமுறைக்கு ஏற்றதுமான சந்தர்ப்பங்களில் நடந்து செல்லுதல் அல்லது ஒரே பயணத்தில் மற்றவர்களுடன் போக்குவரத்தைப் பகிர்ந்துகொள்ளுதல்.

செய்யக்கூடிய விடயங்களைப் பற்றி யதார்த்தமாகச் சிந்தியுங்கள். குடும்பங்களின் வருமானம், திறன்கள் மற்றும் சேவைகளைப் பெற்றுக்கொள்ளும் வாய்ப்புகள் வேறுபடுகின்றன. அத்தியாவசிய சுகாதாரப் பொருட்கள் மற்றும் மாற்றுத்திறனாளிகளின் தேவைகளைப் பூர்த்தி செய்யும் பொருட்களைப் பயன்படுத்துவதற்குத் தடைகளை ஏற்படுத்தக்கூடாது.

குடும்பமாகச் செய்யக்கூடிய ஒரு செயற்பாட்டைத் தேர்ந்தெடுப்போம்

ஒரு மரத்தை நட்டு அதைப் பராமரிப்போம்

குறித்த இடத்திற்குப் பொருத்தமான மரத்தைத் தேர்ந்தெடுப்பதற்காக, இதுபற்றி அறிவுள்ள தாவர நாற்றுப் பண்ணையிலோ அல்லது உள்ளூர் சுற்றுச்சூழல் அமைப்பிடமோ ஆலோசனை பெறுங்கள். மரத்தை நடுவதற்கான அனுமதியைப் பெற்றுக்கொள்ளுங்கள். மரம் வளர்ந்த பிறகு அது எவ்வளவு பெரியதாக வளரும் என்பதையும் சிந்தித்துப் பாருங்கள்.

மரத்தைப் பராமரிப்பதற்கான திட்டத்தை உருவாக்குங்கள்:

• மரத்திற்குத் தண்ணீர் ஊற்றுவது யார்?

• மரம் சேதமடையாமல் எவ்வாறு பாதுகாப்பது?

• மரத்தின் வளர்ச்சியைக் கண்காணிப்பது எப்போது?

பிள்ளைகள் தங்களால் செய்யக்கூடிய வேலைகளில் உதவலாம். மேலும், படங்கள் அல்லது புகைப்படங்கள் மூலம் மரத்தின் வளர்ச்சியில் ஏற்படும் மாற்றங்களைப் பதிவு செய்யலாம்.

மரத்தை நடுவது ஆரம்பம் மட்டுமே என்பதைத் தெளிவுபடுத்துங்கள். மரத்தை ஆரோக்கியமாகப் பராமரிப்பதும் இந்தச் செயற்பாட்டின் ஒரு பகுதியாகும்.

சமூகத் தூய்மைப்படுத்தும் நிகழ்ச்சியில் பங்கேற்போம்

பெரியவர்களின் மேற்பார்வையும், சேகரிக்கப்படும் குப்பைகளை அகற்றுவதற்கான தெளிவான திட்டமும் கொண்ட ஒழுங்கமைக்கப்பட்ட நிகழ்ச்சியைத் தேர்ந்தெடுங்கள்.

கால்களை முழுமையாக மூடும் காலணிகளையும் பொருத்தமான கையுறைகளையும் அணியுங்கள். பிள்ளைகள் கூர்மையான பொருட்கள், ஊசிகள், இரசாயனப் பொருட்கள் இருந்த கொள்கலன்கள் மற்றும் ஏனைய ஆபத்தான குப்பைகளைத் தொடவோ சேகரிக்கவோ கூடாது. பாதுகாப்பற்ற நீர்நிலைகள் மற்றும் வாகனங்கள் பயணிக்கும் இடங்களிலிருந்து விலகியிருங்கள்.

நிகழ்ச்சி முடிந்த பின்னர் இவ்வாறு கேளுங்கள்:

“நாம் அதிகமாகக் கண்ட குப்பைகள் எத்தகையவை? மீண்டும் இந்த இடத்தில் குப்பைகள் குவிவதை எவ்வாறு தடுக்கலாம்?”

அவர்களின் பதில்களை அடிப்படையாகக் கொண்டு, பொருத்தமான குப்பைத் தொட்டிகளை அமைத்தல், முறையாகக் குப்பைகளைச் சேகரித்தல் அல்லது ஒருமுறை பயன்படுத்திவிட்டுத் தூக்கி எறியப்படும் பொருட்களின் பயன்பாட்டைக் குறைத்தல் போன்ற விடயங்களைப் பற்றிக் கலந்துரையாடுங்கள்.

இரண்டு வார பிளாஸ்டிக் குறைப்பு சவாலை மேற்கொள்வோம்

முதல் வாரத்தில் உங்கள் குடும்பம் பயன்படுத்தும், ஒருமுறை பயன்படுத்திவிட்டுத் தூக்கி எறியப்படும் பிளாஸ்டிக் பொருட்களைப் பட்டியலிடுங்கள். இதற்காக அழுக்கான குப்பைகளைக் கிளறிப் பார்க்க வேண்டிய அவசியமில்லை.

இரண்டாவது வாரத்தில், அவற்றின் பயன்பாட்டைக் குறைப்பதற்காக ஒரு விடயத்தைத் தேர்ந்தெடுங்கள். உதாரணமாக:

“நாம் பொருட்கள் வாங்கச் செல்லும் ஒவ்வொரு முறையும் எங்களுடைய பைகளை எடுத்துச் செல்வோம்.”

எந்த விடயங்கள் வெற்றியளித்தன, எவை சிரமமாக இருந்தன என்பதைப் பற்றிப் பேசுங்கள். யாராவது மறந்துவிட்டால் அவர்களைக் குறை கூறுவதற்குப் பதிலாக, திட்டத்தை மாற்றியமைக்கவும்.

பொறுப்புடன் குப்பைகளை அகற்றுவதைக் கற்பிப்போம்

உங்கள் பகுதியில் குப்பைகளைச் சேகரிக்கும் சேவை, மறுசுழற்சிக்காக எந்தெந்தப் பொருட்களை ஏற்றுக்கொள்கிறது என்பதை விசாரியுங்கள். அவர்களின் அறிவுறுத்தல்களுக்கு ஏற்ப குப்பைகளை வகைப்படுத்துங்கள்.

வடிகால்கள், நீர்வழிகள் அல்லது வெற்றுக் காணிகளில் குப்பைகளை வீச வேண்டாம். வீட்டில் பிளாஸ்டிக்கை எரிக்க வேண்டாம். திறந்த வெளியில் பிளாஸ்டிக்கை எரிப்பதால், மனித ஆரோக்கியத்திற்கும் சுற்றுச்சூழலுக்கும் தீங்கு விளைவிக்கும் மாசுபடுத்தும் பொருட்கள் வெளியேறுகின்றன.

குப்பைகளைச் சேகரிக்கும் பணியாளர்களை மரியாதையுடன் நடத்துங்கள். அவர்கள் செய்யும் வேலை முழுச் சமூகத்திற்கும் எவ்வாறு பயனளிக்கிறது என்பதைப் பிள்ளைகளுடன் கலந்துரையாடுங்கள்.

பிள்ளைகள் தங்களுடைய கருத்துகளை முன்வைக்க உதவுவோம்

பாடசாலையிலோ அல்லது அயல்பகுதியிலோ என்னென்ன மாற்றங்களைக் காண விரும்புகிறார்கள் என்று பிள்ளைகளிடம் கேளுங்கள். தண்ணீர்ப் போத்தல்களை மீண்டும் நிரப்பக்கூடிய இடமொன்றை ஏற்படுத்துதல், பொருட்களைச் சரிசெய்யும் ஒரு தினத்தை ஏற்பாடு செய்தல் அல்லது நிகழ்ச்சிகளின்போது ஒருமுறை பயன்படுத்தப்படும் பொதியிடல்களைக் குறைத்தல் போன்ற யோசனைகள் அவர்களிடம் இருக்கலாம்.

அந்த யோசனைகளைப் பொறுப்பானவர்களிடம் மரியாதையுடன் முன்வைக்க உதவுங்கள். பிளாஸ்டிக் பயன்பாட்டைக் குறைப்பதற்கும் குப்பை முகாமைத்துவத்தை மேம்படுத்துவதற்கும் வணிக நிறுவனங்களுக்கும் அரச நிறுவனங்களுக்கும் பொறுப்பு உள்ளது.

பொறுப்பைப் பகிர்ந்துகொண்டு நம்பிக்கையூட்டும் செய்தியை வழங்குவோம்

“இந்தப் பிரச்சினையைத் தீர்க்க வேண்டியது உங்கள் தலைமுறையின் பொறுப்பு” என்று கூற வேண்டாம். பெரியவர்களும் செயல்பட வேண்டும்.

பிள்ளைகள் கவலையடைகிறார்கள் என்றால், அவர்களுக்குச் செவிசாயுங்கள். உங்களால் ஒன்றாகச் செய்யக்கூடிய ஒரு செயலைத் தேர்ந்தெடுங்கள். அதேவேளை, சுற்றுச்சூழல் பிரச்சினைகளைத் தீர்ப்பதற்கு சமூகத்திலும் நிறுவனங்களிலும் பரந்த அளவிலான மாற்றங்கள் அவசியம் என்பதையும் தெளிவுபடுத்துங்கள்.

பிள்ளைகளின் அக்கறை, கருத்துகள் மற்றும் முயற்சிகளைப் பாராட்டுங்கள். மகிழ்ச்சியாக இருப்பதற்கும் அவர்களுக்கு இடமளியுங்கள். வீட்டுத் தோட்டம் அமைத்தல், நடந்து செல்லுதல், பொருட்களைச் சரிசெய்தல் மற்றும் அயலவர்களுடன் இணைந்து பணியாற்றுதல் போன்றவை மகிழ்ச்சியையும் மனநிறைவையும் அளிக்கும் அனுபவங்களாக அமையலாம்.

பிள்ளைகளுக்குக் கூற வேண்டிய முக்கியமான செய்தி:

எமது சுற்றுச்சூழலைப் பாதுகாப்பது நாம் அனைவரும் ஒன்றிணைந்து செய்யும் ஒரு செயல். உங்களுடைய கருத்துகள் முக்கியமானவை. உங்களுடன் இணைந்து செயல்படுவது பெரியவர்களினதும் பொறுப்பாகும்.